Þurfum að herða lög gegn innherjaviðskiptum og markaðsmisnotkun

Ísland þarf að herða lög sem ætlað er að koma í veg fyrir innherjaviðskipti og markaðsmisnotkun. Þetta kemur fram í rökstuddu áliti Eftirlitsstofnunar EFTA (ESA) sem sent var til Íslands í dag.

Í frétt á vef ESA segir að markmið tilskipunar um markaðsmisnotkun sé að endureisa markaði sem fjárfestar og almenningur geti treyst. Reglur um innherjaviðskipti og upplýsingagjöf séu lykilatriði í tilskipuninni. Ísland hafi hins vegar ekki enn innleitt að fullu ákvæði hennar um skilvirka og fullnægjandi dreifingu innherjaupplýsinga til almennings.

„Með tilskipuninni er stigið stórt skref í þá átt að samþætta fjármálamarkaði á Evrópska efnhagssvæðinu (EES) sem fjárfestar og almenningur geta treyst. Aukin trú fjárfesta og almennings á þeim leikreglum sem gilda um fjármálamarkaðinn er forsenda hagvaxtar og verðmætasköpunar. Samræmdar reglur á þessu sviði hafa jafnframt í för með sér verulegan efnahagslegan ábata," segir í frétt á vef ESA.

Íslensk stjórnvöld hafa fallist á athugasemdir ESA og upplýst að viðeigandi lagabreytingar verði gerðar fyrir árslok 2012.

Rökstudda álitið telst lokaaðvörun í málinu. ESA getur ákveðið að leggja málið fyrir EFTA dómstólinn ef Ísland fer ekki að álitinu innan tveggja mánaða frá móttöku þess.