Fjöldi fasteignakaupa jókst um 32% milli ára í júní

Fjöldi fasteignakaupa á höfuðborgarsvæðinu jókst um tæp 32% milli ára í júní á höfuðborgarsvæðinu. Veltan jókst um tæpt 41% á milli ára.

Þetta kemur fram á vefsíðu Þjóðskrár Íslands. Þar segir að fjöldi þinglýstra kaupsamninga um fasteignir við sýslumannsembættin á höfuðborgarsvæðinu í júní s.l. var 490. Heildarvelta nam 14,9 milljörðum króna og meðalupphæð á hvern kaupsamning var 30,4 milljónir króna.

Þegar júní í ár er borinn saman við júní í fyrra fjölgar kaupsamningum um 31,7% og velta eykst um 40,7%. Í júní í fyrra var þinglýst 372 kaupsamningum, velta nam 10,6 milljörðum króna og meðalupphæð á hvern kaupsamning 28,5 milljónir króna.

Makaskiptasamningar voru 26 í júní s.l. eða 5,5% af öllum samningum. Í júní í fyrra voru makaskiptasamningar 19 eða 5,4% af öllum samningum. Makaskiptasamningur er þegar hluti kaupverðs er greiddur með annarri fasteign. Upplýsingar um makaskiptasamninga eiga eingöngu við um íbúðarhúsnæði.