Mikil umsvif á íbúðamarkaði

Samtals var 490 kaupsamningum um íbúðarhúsnæði þinglýst á höfuðborgarsvæðinu í júní og nam veltan 14,9 milljörðum króna samkvæmt nýjum tölum frá Þjóðskrá Íslands og greiningadeild Íslandsbanka greinir frá.

Meðalupphæð á hvern kaupsamning var 30,4 m. kr. Þetta er nánast sami fjöldi samninga og var í fyrri mánuði en þá voru gerðir 492 samningar. Veltan dregst lítillega saman frá fyrri mánuði eða um 0,7%. Samanborið við júní í fyrra hefur veltan hinsvegar stóraukist, eða um 30% þegar kemur að fjölda samninga og um 40% þegar horft er á veltuna.

Umsvif á íbúðamarkaði hafa aukist mikið undanfarið. Þannig voru á fyrri helmingi ársins gerðir samtals 2.501 kaupsamningar um íbúðarhúsnæði á höfuðborginni fyrir samtals 76 ma.kr., en á sama tímabili í fyrra höfðu verið gerðir 2.045 samningar fyrir samtals 60 ma.kr.

Nemur þetta aukningu um 22% á milli ára í fjölda samninga og um 27% í veltu. Íbúðaverð á höfuðborgarsvæðinu hefur undanfarna sex mánuði hækkað um 2,1% að nafnvirði. Síðastliðna 12 mánuði nemur hækkunin 5,3% að nafnvirði. Að raunvirði hefur íbúðaverð á höfuðborgarsvæðinu staðið í stað á sama tímabili.