Uppgreiðsla lána sparar ríkinu 4,7 milljarða á ári

Uppgreiðsla Seðlabankans á lánum frá Alþjóðagjaldeyrissjóðnum og Norðurlöndunum mun spara ríkinu um 4,7 milljarða króna á ári í vaxtagreiðslur.

Fjallað er um málið í Markaðspunktum greiningar Arion banka. Eins og fram hefur komið munu ríkissjóður og Seðlabankinn greiða í þessari viku 171 milljarð kr. inn á lán frá AGS og Norðurlöndunum. Um er að ræða fyrirframgreiðslu þar sem þessi lán eru ekki enn á gjalddaga. Samtals verður þar með búið að endurgreiða 53% af lánum til AGS og 59% af lánum til Norðurlandanna.

Greiningin segir að með þessu sé verið að senda út sterk skilaboð um ímynd íslenska ríkisins sem öruggs skuldara.

Á meðan ekki er farið í nýja lántöku blasir við að vaxtakostnaður gjaldeyrisforðans í erlendri mynt mun lækka svo nokkru nemur. Greiningin metur þá lækkun upp á 4,7 milljarða á ári m.v. þá vexti sem voru á lánunum.

Þá segir að skuldsettur gjaldeyrisforði Seðlabankans minnkar en að ráðstöfunin hafi engin áhrif á nettó stöðu forðans.