Arnar efast um tölur OECD

Arnar Sigurmundsson, forstjóri Landssamtaka Lífeyrissjóða, segir alrangt að raunávöxtun íslenskra lífeyrissjóða hafi verið neikvæð um 8% á ári að meðaltali frá árinu 2007. Raunávöxtunin að meðaltali sé raunar neikvæð ef síðustu fjögur ár eru skoðuð í einu og þar vegi bankahrunið mest. Hins vegar sé 8% ekki rétt tala.

„Áhrif hrunsins munu auðvitað lengi koma fram í meðaltalsávöxtun þó einhver ár leggist við. En þessar tölur passa engan vegin við það sem ég þekki. Þetta kemur mér mjög á óvart," segir Arnar.

Í frétt á Vísi í morgun kom fram að raunávöxtun lífeyrissjóðanna hér á landi væri sú versta í öllum OECD löndunum. Þar var byggt á nýrri skýrslu OECD ríkjanna um lífeyrissjóði og frammistöðu þeirra frá hruni og því slegið fram að ávöxtunin væri neikvæð um 8% á ári.

Samkvæmt tölum frá Landssamtaka Lífeyrissjóða var hrein raunávöxtun íslenskra lífeyrissjóða neikvæð um 21,5% árið 2008. Strax eftir það byrjuðu lífeyrissjóðirnir að rétta úr kútnum. Árið 2009 var raunávöxtunin jákvæð um 0,3%. Árið 2010 var hún 2,7% og á síðasta ári 2,4%. Miðað við það er því fjarri lagi að hún sé neikvæð um 8% á ári að meðaltali á tímabilinu. 4% prósent væri nær lagi.