DataMarket í alþjóðlegu rannsóknar- og þróunarverkefni

Íslenska nýsköpunarfyrirtækið DataMarket er meðal þátttakenda í stóru rannsókna- og þróunarverkefni sem leitt er af Tækniháskólanum í Berlín. Verkefnið er fjármagnað að stórum hluta af 7. rammaáætlun Evrópusambandsins.

Verkefnið, sem gengur undir vinnuheitinu DOPA, snýst um að samræma aðgang að og tengja saman margvísleg gagnasöfn, einkum þeirra sem tengjast efnahags- og fjármálum Evrópuríkja.



Þáttur DataMarket í verkefninu snýr að öflun og miðlun tölulegra gagnasafna, þar á meðal hagtalna, gengisupplýsinga og vaxtaupplýsinga og myndræna framsetningu þeirra.

Aðrir þátttakendur koma að verkefninu með umfangsmikil söfn textaupplýsinga s.s. lagasöfn, dóma, einkaleyfaskráningar og kauphallartilkynningar. Allar þessar upplýsingar verður unnt að tengja saman, leita í og myndbirta fyrir tilstilli DOPA verkefnisins.

Verkefnistíminn er tvö ár og nemur fjármögnun Evrópusambandsins rétt tæpum 2 milljónum evra eða um 315 mkr. og hlutur DataMarket í verkefninu er 60 mkr.



Fylgjast má með framgangi verkefnisins á vefsíðu þess.