Íslandsbanki mun ekki sækja ríkið um skaðabætur

Það stendur ekki til að Íslandsbanki sæki íslenska ríkið um skaðabætur vegna laga sem skylduðu bankann til að endurútreikna lán sem bankinn veitti og voru miðuð við gengi erlendra gjaldmiðla. Þessari spurningu var velt upp eftir að Hæstiréttur kvað upp dóm síðasta fimmtudag þar sem komist var að þeirri niðurstöðu að lán frá Íslandsbanka sem voru miðuð við erlenda gjaldmiðla væru lögmæt.

Íslandsbanki hefur endurreiknað 95% af öllum lánum einstaklinga sem miðuð voru við gengi erlendra gjaldmiðla. Miðað var við lög um leiðréttingu gengistryggðra lána frá árslokum 2010 og í sumum tilvikum gengið lengra en lögin sögðu til um. Sömuleiðis hefur bankinn boðið upp á höfuðstólslækkun.

Þó að Hæstiréttur hafi komist að þeirri niðurstöðu að lán frá Íslandsbanka hafi í raun verið lögmæt stendur ekki til að snúa þeim leiðréttingum og endurreikningi við, segir Guðný Helga Herbertsdóttir, upplýsingafulltrúi bankans. „Hann stendur," segir hún og því mun dómurinn sem féll á fimmtudaginn ekki koma venjulegu fólki illa.