Slitastjórn Kaupþings krefst kyrrsetningar á eignum Hannesar

Slitastjórn Kaupþings krafðist í dag kyrrsetningar á eignum Hannesar Frímanns Hrólfssonar, aðstoðarforstjóra Auðar Capital og fyrrverandi aðstoðarframkvæmastjóra fjárstýringar og markaðsviðskipta Kaupþings. Sýslumaðurinn í Reykjavík frestaði því að taka afstöðu til kyrrsetningarinnar og verður hún tekin fyrir á fimmtudag, samkvæmt heimildum fréttastofu.

Hannes skuldaði Kaupþingi 2,4 milljarða króna við fall bankans 9. október 2008 vegna lána sem hann hafði fengið hjá bankanum til kaupa á hlutabréfum í Kaupþingi, samkvæmt upplýsingum í skýrslu Rannsóknarnefndar Alþingis. Kyrrsetningarbeiðnin tengist m.a. innheimtu slitastjórnarinnar á þessari skuld en samkvæmt heimildum fréttastofu er Hannes í persónulegum ábyrgðum vegna hluta fyrrnefndra skulda við þrotabú Kaupþings.

Hannes hefur átt í samningaviðræðum við slitastjórn Kaupþings vegna skuldanna frá hruni. Hannes færði m.a. eignir frá konu sinni yfir á sjálfan sig, sem hann hafði fært á konu sínu í hruninu, eftir samningaviðræður við slitastjórnina. Slitastjórnin hefur nú ákveðið að grípa til fyrrnefndra aðgerða, þ.e. að krefjast kyrrsetningar á eignum, til þess að reyna að tryggja betur að einhverjar eignir fáist upp í skuldir.