Kringlan fékk alþjóðleg verðlaun

Verslunarmiðstöðin Kringlan hlaut nýverið alþjóðleg verðlun frá ICSC, sem eru alþjóðleg samtök verslunarmiðstöðva. Kringlan fékk silfurverðlaun í flokki „söludrifinna markaðsviðburða" meðal verslunarmiðstöðva í Evrópu árið 2012.

Verðlaunin voru veitt í Búdapest í Ungverjalandi en markaðsátakið „Miðnætursprengja Kringlunnar" þótti mjög vel útfært og árángursríkt, að mati dómnefndar. Um 30 þúsund manns lögðu leið sína í Kringluna þann daginn, sem er aðsóknarmet fyrir utan jólaverslunina. Þetta er þriðja skiptið sem Kringlan fær verðlaun frá samtökunum.

Sigurjón Örn Þórðarson, framkvæmdastjóri Kringlunnar, segir í tilkynningu að verðlauninhafi mikla þýðingu fyrir Kringluna. „Þau sýna m.a. að við erum að gera hluti sem standast samanburð á alþjóðlegum vettvangi. ICSC er fagráð og meðlimir þess eru yfir 55 þúsund fyrirtæki og samtök í ríflega 90 löndum. Þetta er ánægjulegt og ætti að vera staðfesting á því fyrir viðskiptavini og starfsfólk að Kringlan er að gera hluti sem standast samanburð hvar sem er í heiminum."