Mikill vöxtur í kortanotkun Íslendinga erlendis milli ára

Umtalsverður vöxtur varð í kortaveltu Íslendinga erlendis í maí mánuði. Veltan á erlendri grundu jókst um 10,4% að raungildi frá sama tímabili fyrra árs.

Þetta kemur fram í Morgunkorni greiningar Íslandsbanka. Þar segir að fyrstu fimm mánuði ársins hafi kortavelta landans á erlendri grundu aukist um 8,3% að raungildi frá sama tímabili fyrra árs en á sama tíma hefur brottförum Íslendinga um Leifsstöð fjölgað um 5%. Af þessu má sjá að Íslendingar eru að eyða meira að jafnaði í utanlandsferðum sínum nú heldur en á síðasta ári.

Mikill aukning varð einnig í kortaveltu útlendinga hér á landi í maí en aukningin nemur 10,9% að raungildi á milli ára. Fyrstu fimm mánuði ársins hefur kortavelta erlendra korta hér á landi aukist um 9% að raungildi frá sama tímabili fyrra árs og er það mun minni aukning en sem nemur aukningu í komu erlendra ferðamanna á sama tímabili en fyrstu 5 mánuði ársins hefur erlendum ferðamönnum fjölgað um 20% frá sama tímabili fyrra árs.

„Vissulega segir kortanotkun ferðamanna ekki alla söguna, en auk korta geta þeir komið með ferðaávísanir eða reiðufé. Engu að síður er það athyglisvert að úttektir korta séu ekki að aukast meira en raun ber vitni með þessari miklu aukningu ferðamanna," segir í Morgunkorninu.