Dómur í máli Jóns Ásgeirs gegn Glitni

Í dag verður kveðinn um dómur í Hæstarétti í máli Jóns Ásgeirs Jóhannessonar gegn Glitni. Málið varðar málskostnað vegna kyrrsetningaraðgerða í Englandi þar sem eignir Jóns í London voru frystar.

Yfirréttur í London úrskurðaði að Jón Ásgeir ætti að greiða Glitni kostnað af kyrrsetningaraðgerðunum. Hinn 31. ágúst 2010 greiddi Jón Ásgeir 150.000 bresk pund (tæpar 30 milljónir króna) og vildi meina að það væri fullnaðargreiðsla. Á það féllst Glitnir ekki en heildarkrafa Glitnis er 604 þúsund pund (um 110 milljónir).

Dómurinn sem kveðinn verður upp í dag mun skera úr um það hvort um fullnaðargreiðslu hafi verið að ræða eða ekki. Héraðsdómur Reykjavíkur komst í nóvember á síðasta ári að þeirri niðurstöðu að ekki hefði verið um fullnaðargreiðslu að ræða, þ.e. Jón Ásgeir skuldi Glitni ennþá vegna kostnaðar sem bankinn hafði af kyrrsetningaraðgerðunum á Englandi.