Forstjóri Regins: Vonandi fær félagið trúverðuga og góða eigendur

Helgi S. Gunnarsson, forstjóri fasteignafélagsins Regins, sem skráð verður á markað síðar í sumar, segist binda vonir við að félagið fái góða og trúverðuga eigendur, sem tilbúnir verið að styðja við skynsamlegar ákvarðanir. Félagið sé stöðugt og gott rekstrarfélag með langatímaleigusamninga á góðum stöðum, m.a. í Smáralind og Egilshöll, sem eru stærstu einstöku eignir félagsins. „Þetta er spennandi og góður lokahnykkur á langt og strangt undirbúningsferli," segir Helgi í ítarlegu viðtali í nýjasta þætti Klinkisins, þar sem hann ræðir söluna á félaginu, fasteignamarkaðinn, eignasafnið ásamt fleiru.

Hlutafjárútboð félagsins fer fram dagana 18. og 19. júní 2012, þ.e. nk. mánudag og þriðjudag. Eignarhaldsfélag Landsbankans ehf. mun bjóða til sölu 975.000.000 áður útgefna hluti í Regin, sem samsvarar 75% af heildarhlutafé í Regin. Allir hlutir í útboðinu verða seldir á sama verði sem liggja mun á verðbilinu 8,1-11,9 krónur á hvern hlut í Regin. Söluandvirði útboðsins getur numið á bilinu 7,9-11,6 milljarðar króna. Markaðsvirði alls hlutafjár í Regin miðað við fyrrgreint verðbil er á bilinu 10,5-15,5 milljarðar króna.

En félagið verður að þessu loknu skráð á markað Nasdaq Kauphallar Íslands, líklega í júlímánuði.

Sjá má viðtalið við Helga í heild sinni hér.