Yfirdráttarlánin tvöfaldast á síðustu þremur árum

Yfirdráttarlán heimilanna hafa nærri tvöfaldast á síðustu þremur árum og eru nú svipuð og þau voru síðustu mánuðina fyrir hrun. Hver fjárráða einstaklingur skuldar nú að meðaltali rúmar þrjú hundruð þúsund krónur í yfirdrátt.

Yfirdráttarlán heimilanna hafa hækkað um rúma fimm milljarða frá áramótum og námu alls sjötíu og fjórum milljörðum í lok aprílmánaðar.

Síðustu misserin fyrir bankahrun voru yfirdráttarlánin að meðaltali í kringum sjötíu milljarða. Hæst fóru þau í sjötíu og átta milljarða í septembermánuði árið 2008 en eftir bankahrun fóru þau hratt lækkandi og lægst niður í fjörutíu og þrjá milljarða í júlímánuði 2009. Síðan þá hefur talan farið hækkandi og eins og sjá má á þessu línuriti og hafa lánin nærri tvöfaldast á þremur árum.

En tökum dæmi til að setja þessar tölur í einfalt samhengi.

Í júlímánuði 2009 skuldaði hver fjárráða einstaklingur hér á landi að meðaltali tæpar hundrað og áttatíu þúsund krónur í yfirdrátt. Í dag skuldar þessa einstaklingur 308 þúsund krónur og hefur yfirdrátturinn því hækkað um tæpar 130 þúsund krónur á þremur árum

Yfirdráttarlán bera háa vexti eða meðaltali 12 til 13 prósent. Árlegur vaxtakostnaður af meðal yfirdráttaskuld er því um 25 þúsund krónur á ári.