Fjögur skip og 40 þotur með 16.000 ferðamenn koma í dag

Rúmlega 16 þúsund ferðamenn eru væntanlegir til landsins í dag með fjórum skemmtiferðaskipum til Reykjavíkur og 40 þotum, sem lenda í Keflavík.

Þetta mun vera mesti fjöldi sem komið hefur til landsins á einum degi til þessa. Auk þessara farþega eru liðlega þrjú þúsund manns í áhöfnum skemmtiferðaskipanna og fara margir þeirra líka í land.

Flestir farþeganna ætla í skipulagðar ferðir og hafa eitthvað á annað hundrað rútur verið bókaðar til þeirra flutninga. Þó nokkrir ætla í jeppaferðir á Langjökul, smárútur munu ferja farþega í bæjarferðir og einhverjir ætla í hvalaskoðunarferðir.