Íslandsbanki braut lög um persónuvernd

Íslandsbanki braut persónuverndalög með útsendingu markpósts sem barst fermingarbarni og foreldrum hans í lok mars, enda eru þau öll bannmerkt í Þjóðskrá. Hjónin gerðu sérstaklega athugasemd við það að pósturinn hefði verið sendur á ólögráða einstakling sem mætti ekki gera fjárhagsskuldbindingar.

Persónuvernd gaf Íslandsbanka færi á að svara fyrir kvörtunina og gáfu þær skýringar að um mannleg mistök hefði verið að ræða þegar pósturinn var sendur á fólk sem var bannmerkt. Hjónin sögðu að þau svör væru í takt við það sem þau höfðu búist við. „En það sem er öllu verra er að Persónuvernd skuli ekki einu sinni ansa þeirri málaleitan okkar hjóna um úrskurð um lögmæti þess að senda svona markpóst á ólögráða einstaklinga," sögðu hjónin jafnframt.

Persónuvernd komst að þeirri niðurstöðu að Íslandsbanki hefði brotið lög með því að senda póst á fólk sem væri bannmerkt í Þjóðskrá. En tekið er fram í úrskurðinum að það fellur utan valdsviðs Persónuverndar að ákveða við hvaða aldur megi miða við útsendingu á markpósti.