Íslendingar greiða mest allra þjóða með kortum og netinu

Íslendingar eru sú þjóð í heiminum sem notar mest af greiðslukortum og netið til að borga reikninga sína. Íslendingar eru jafnframt í hópi þeirra þjóða sem nota hvað minnst af reiðufé í viðskiptum sínum.

Þetta kemur fram í árlegri skýrslu Seðlabanka Noregs um greiðslukerfi í Noregi. Norðmenn fylgja fast á eftir Íslendingum í þessum efnum.

Í skýrslunni, sem nær yfir síðasta ár, kemur fram að hver Íslendingur notar að jafnaði kort sitt eða netaðgang til að borga yfir 350 greiðslur á ári. Í Noregi er þetta um 300 greiðslur á hvern íbúa en í þriðja sæti eru Bandaríkjamenn með rúmlega 200 greiðslur.

Í skýrslunni kemur einnig fram að íbúar Norðurlandanna, fyrir utan Finnland, nota minnst allra þjóða reiðufé í viðskiptum sínum. Aðeins 5% til 6% íbúa þessara landa, þar á meðal Íslands, nota reiðufé sem greiðslumáta.

Bandaríkjamenn eru sú þjóð sem hlutfallslega notar mest af reiðufé í greiðslum eða rúmlega 50% þeirra. Næst á eftir kemur Hong Kong þar sem hlutfallið er um 35%.