"Mótum framtíðina" - Kauphöllin opnar nýja vefsíðu

Kauphöllin (NASDAQ OMX Iceland) hefur opnað nýja vefsíðu á bæði íslensku og ensku. Vefsíðan eru hluti af átakinu „Mótum framtíðina" en hún er ætluð sem upplýsingasíða fyrir innlenda sem erlenda fjárfesta, fyrirtæki og áhugafólk um íslenska markaðinn.

Í fréttatilkynningu frá NASDAQ OMX Nordic segir: „Heitið á átakinu vísar í að það er í okkar höndum - samvinnuverkefna stjórnvalda, viðskipta- og atvinnulífs sem og einstaklinga - að móta okkar eigin framtíð í vexti Íslands."

Vefsíðan hefur að geyma viðtöl og hlekki á ýmislegan fróðleik um markaðinn, viðskiptaumhverfi, hlutverk Kauphallarinnar, skráningarferilinn, fjárfestatengsl og ýmislegt fleira. Þá verður nýju efni bætt á síðuna reglulega í samstarfi við ýmsa aðila.

„Með átakinu okkar sem við kjósum að kalla „Mótum framtíðina" viljum við beina athyglinni að þeim tækifærum sem felast í vexti íslensks efnahagslífs og eru langt í frá fullnýtt," segir Páll Harðarson, forstjóri NASDAQ OMX Iceland. „Hlutverk kauphallar í hverju landi fyrir sig er ekki síst að veita þannig fyrirtækjum vettvang til að nálgast fjárfesta og öfugt og styðja þannig við efnahagslífið. Þessari nýju síðu er ætlað að vera lifandi upplýsingasíðan sem vonandi nýtist bæði fjárfestum og fyrirtækjum í upplýsingaöflun um markaðinn."

Hægt er að nálgast vefsíðuna hér.