Hiti á alþingi vegna kvótamálsins

Þingmenn stjórnarandstöðunnar sökuðu stjórnarliða um forkastanleg vinnubrögð í kvótamálinu á alþingi í morgun. Önnur umræða um frumvarp um breytingar á veiðigjöldum hófst í dag þrátt fyrir mótmæli framsóknar- og sjálfstæðismanna.

Atvinnuveganefnd Alþingis afgreiddi frumvarp um breytingar á veiðgjöldum úr nefnd á þriðjudag. Önnur umræða um málið hófst svo á þriðja tímanum í dag.

Þingmenn stjórnarandstöðunnar mótmæltu því í morgun að málið væri sett á dagskrá áður en búið er að afgreiða hitt kvótafrumvarpið, sem snýr að breytingum á fiskveiðistjórnunarkerfinu, úr nefnd.

„Það eru því forkastanleg vinnubrögð að taka þetta mál á dagskrá í dag," segir Jón Gunnarsson, þingmaður Sjálfstæðisflokks. „Það er ekki umræðuhæft vegna þess að svo mikil vinna er augljóslega eftir af hálfu meirihlutans við svokallað fiskveiðistjórnunarfrumvarp."

„Það er engin glóra að fara ræða hvernig á að skattleggja ef við vitum ekki hver skattstofninn er," segir Tryggvi Þór Herbertsson, þingmaður Sjálfstæðisflokks.

Steingrímur J. Sigfússon, sjávarvútvegsráðherra, segir að veiðigjaldafrumvarpið sé sjálfstætt mál.

„Það er búið að gera umtalsverðar breytingar á þessu frumvarpi og koma til móts við gagnrýni og sjónarmið útgerðarinnar og lækka þetta verulega þannig að það er orðið erfitt að halda því fram með nokkrum gildum rökum að þetta mál sé ekki tilbúið til umræðu og komið í þann búning sem alþingi getur fjallað um."

Ekkkert samkomulag liggur fyrir um framhald þingstarfa. Steingrímur á von á því að umræðan um kvótafrumvörpin taki langan tíma.

„Mér sýnist alveg að það gæti farið svo, menn báðu um tvöfaldan ræðutíma," segir Steingrímur. „Auðvitað þetta er stórt mál þá verður þingið að taka sér þann tíma sem það telur sig þurfa. Þetta er ósköp einfalt."