SUS vill að ríkið selji Landsvirkjun

Stjórn Sambands ungra sjálfstæðismanna (SUS) vill að ríkið selji Landsvirkjun og hætti ekki frekari skattpeningum í áhættusamar fjárfestingar í orkugeiranum.

Þetta kemur fram í ályktun sem SUS hefur sent frá sér. Þar segir að Landsvirkjun áformi fjárfestingar fyrir 400 milljarða á næstu 10 árum og fyrir um 180 milljarða árin 2021-2025. Öll sú fjárfesting yrði á áhættu skattgreiðenda, enda eru það annað hvort fjármunir ríkisins sem settir yrðu í slíkt eða lánsfé sem ríkissjóður yrði í ábyrgð fyrir.

„Gangi áætlanir Landsvirkjunar eftir mun það þýða að skuldir fyrirtækisins myndu meira en tvöfaldast. Áhætta félagsins mun jafnframt aukast mikið þar sem hlutfall sölu til stóriðju myndi hækka úr 80% í 90%. Þetta myndi einnig fela það í sér að eitt og sama fyrirtækið myndi nýta nánast alla virkjanakosti í nýtingarflokki samkvæmt drögum að rammaáætlun. Þetta myndi þýða að engin samkeppni yrði framvegis í orkuframleiðslu eins og gert er ráð fyrir samkvæmt EES-samningnum," segir í ályktuninni.

„Gríðarlegur rekstarvandi Orkuveitunnar, sem allir flokkar sem voru í borgarstjórn árin fyrir hrun bera ábyrgð á, auk hruns bankanna ættu að kenna okkur dýrmæta lexíu um hve hættulegt það getur verið að leggja opinbert fé í áhættufjárfestingar og að embættis- og stjórnmálamenn eiga ekki að stefna skattpeningum í hættu með áhættufjárfestingum."