ÍLS býður upp á óverðtryggð lán síðsumars

Íbúðalánasjóður hyggst hefja lánveitingar á óverðtryggðum lánum í lok sumars, en endanleg útfærsla á þeim lánum liggur ekki fyrir. Framkvæmdastjóri sjóðsins segir að fólk þurfi að vera meðvitað um að óverðtryggð geti reynst þung í skauti fyrir þá sem hafa spennt bogann hátt.

Íbúðalánasjóður hefur að undanförnu undirbúið lánveitingar á óverðtryggðum lánum en stefnt er að því að hefja þær lánveitingar síðsumars, að sögn Sigurðar Erlingssonar, framkvæmdastjóra Íbúðalánasjóðs. Hann segir mikilvægt að lántakendur séu vel upplýstir um að því fylgi áhætta að taka óverðtryggð lán.

Um fjórðungur nýrra húsnæðislána er nú tekinn hjá Íbúðalánasjóði, en þrír fjórðu hjá bönkunum. Langstærstur hluti nýrra lána hjá bönkunum er óverðtryggður, annað hvort með föstum vöxtum til þriggja og fimma ára, eða með breytilegum vöxtum, sem breytast í takt við vaxtaákvarðanir seðlabankans.

Sigurður segir að fólk verði að hafa það hugfast að vaxtakostnaður geti hækkað skarplega í því óstöðuga umhverfi sem ríkir í íslenska hagkerfinu. Mikil verðbólga er þar ekki síst ástæða hárra vaxta.