Sex laxar á morgunvaktinni í Norðurá

Þrátt fyrir mikinn klulda og töluvert minna rennsli í Norðurá veiddust sex laxar á morgunvaktinni.

Hörður Vilberg, einn stjórnarmanna í Stangaveiðifélagi Reykjavíkur, segir að áin hafa einungis verið sex gráðu heit í morgun og lofthiti um sjö stig. Menn séu því bara nokkuð sáttir við að hafa náð sex löxum. Þá segir hann að rennsli í ánni hafi minnkað töluvert. Þegar veiði hófst í gærmorgun var áin í 30 rúmmetrum á sekúndu en í morgun var hún komin niður í 17 rúmmetra.

Fiskarnir í morgun, sem voru flestir 74-78 sentímetrar, veiddust meðal annars á Eyrinni, Krossholunni og Vesturkvíslinni á Múnaðarnessvæðinu.

Hörður sagði að nú seinnipartinn hygðust einhverjir fara í dalinn, meðal annars á veiðistaðinn Króksbrú en laxinn gengur oft hratt þangað.

Alls eru nú komnir 22 laxar á land í Norðurá og allt stefnir í að spá Bjarna Júlíussonar, formanns SVFR, um að þetta verði besta opnunin á þessari öld en mest hafa veiðst 26 laxar í opnuninni síðan árið 2000.

Veiðivísir mun í kvöld upplýsa hvernig kvöldvaktin gekk í Norðurá. Fylgist því vel með.