Hagvöxtur mælist 2,4% á fyrstu mánuðum ársins

Landsframleiðsla jókst um 2,4% að raungildi milli 4. ársfjórðungs í fyrra og 1. ársfjórðungs í ár. Á sama tíma jukust þjóðarútgjöld um 3,4%, sem skýrist að mestu af mikilli aukningu birgða.

Þetta kemur fram á vefsíðu Hagstofunnar. Þar segir að einkaneyslan jókst um 0,3% og samneyslan um 0,4%. Fjárfestingin dróst hins vegar saman um 18,6%.

Útflutningur dróst saman um 5,6% og innflutningur um 5,2% á sama tímabili. Þessar tölur eru árstíðaleiðréttar og miðast við vöxt milli ársfjórðunga, ekki ára.

Landsframleiðsla á 1. ársfjórðungi 2012, án árstíðaleiðréttingar, jókst um 4,5% frá sama ársfjórðungi fyrra árs.