Rannsóknin á Kaupþingsviðskiptum myndi taka mörg ár

Efnahagsbrotadeild bresku lögreglunnar, eða Serious Fraud Office, varaði bræðurna Robert og Vincent Tchenguiz við því að rannsókn á þeirra málum gæti tekið fimm til tíu ár ef þeir myndu ekki fallast á málamiðlun sem þeim var boðin. Þetta kemur fram á vef breska blaðsins Daily Telegraph.

Eins og fram kom í fréttum í gær fólst málamiðlunin í því að bræðurnir myndu greiða sem samsvarar 10 milljörðum íslenskra króna til góðgerðamála gegn því að SFO myndi láta rannsókn á máli þeirra niður falla.

Bræðurnir voru handteknir í fyrra og húsleitir gerðar í húsakynnum þeirra vegna viðskipta við Kaupþing fyrir hrun bankans. Bræðurnir voru í hópi þeirra sem skulduðu bankanum hvað allra mest.

Serious Fraud Office hefur verið gagnrýnd harðlega fyrir aðgerðirnar gegn bræðrunum, en talið er að stofnunin hafi ekki haft nægjanlega traust gögn í höndunum til að fara í húsleitir og handtökur.