Aflaverðmæti eykst um 28,1 prósent milli ára

Aflaverðmæti íslenskra skipa nam 30,1 milljarði króna á fyrstu tveimur mánuðum ársins 2012 samanborið við 23,5 milljarða á sama tímabili 2011. Aflaverðmæti hefur því aukist um 6,6 milljarða eða 28,1% á milli ára, að því er fram kemur á vef Hagstofu Íslands í dag.

Aflaverðmæti botnfisks var 17 milljarðar og jókst um 28,5% frá sama tíma í fyrra þegar aflaverðmætið nam 13,2 milljörðum. Verðmæti þorskafla var um 9,8 milljarðar og jókst um 26% frá fyrra ári. Aflaverðmæti ýsu nam 2,8 milljörðum og jókst um 48,4% en verðmæti karfaaflans nam 2,5 milljörðum, sem er 44% aukning frá fyrstu tveimur mánuðum ársins 2011. Verðmæti ufsaaflans jókst um 47,8% milli ára og nam 1 milljarði króna í janúar til febrúar 2012, samkvæmt upplýsingum Hagstofunnar.

Verðmæti uppsjávarafla nam um 11 milljörðum króna í janúar til febrúar 2012, sem er um 29,6% aukning frá fyrra ári. „Sú aukning skýrist að mestu af loðnuafla að verðmæti 10,8 milljarðar króna samanborið við 7,3 milljarða á fyrstu tveimur mánuðum ársins 2011. Aflaverðmæti flatfisksafla nam um 1,9 milljörðum króna, sem er 17,7% aukning frá janúar til febrúar 2011,“ segir á vefsíðu Hagstofu Íslands.

Verðmæti afla sem seldur er í beinni sölu útgerða til vinnslu innanlands nam 18,7 milljörðum króna og jókst um 29,5% miðað við fyrstu tvo mánuði ársins 2011. Verðmæti afla sem keyptur er á markaði til vinnslu innanlands jókst um 16,7% milli ára og var ríflega 3,7 milljarðar króna. Aflaverðmæti sjófrystingar nam tæpum 6,5 milljörðum í janúar til febrúar og jókst um 34,3% milli ára en verðmæti afla sem fluttur er út óunninn nam rúmum 1 milljarði króna, sem er 33,8% aukning frá árinu 2011.