Fjármögnunarfyrirtækið Lýsing sýknað af kröfum Smákrana

Hæstiréttur sýknaði í dag fjármögnunarfyrirtækið Lýsingu af kröfum Smákrana vegna fjármögnunarleigusamnings sem gerður var fyrir bankahrun. Smákranar héldu því fram að gengistrygging lánssamningsins væri ólögleg og stefndi því Lýsingu fyrir Héraðsdóm Reykjavíkur. Dómur þar féll Smákrönum í hag en Lýsing undi ekki dómsniðurstöðunni og áfrýjaði því málinu til Hæstaréttar.

Hæstiréttur hafði áður dæmt að fjármögnunarleigusamningar sem Kraftvélaleigan gerði við Glitni banka í aðdraganda bankahrunsins hafi verið ólöglegir samningar. Lýsing hélt því aftur á móti fram að þeir samningar sem fyrirtækið gerði við sína viðskiptavini væru ekki sambærilegir þeim samningum sem Glitnir gerði við sína viðskiptavini. Umræddir fjármögnunarleigusamningar voru gerðir til að fjármagna kaup fyrirtækja á atvinnutækjum.

Hæstiréttur segir í dómi sínum í dag að samningurinn sem þetta mál varði sé í ýmsum atriðum frábrugðinn samningnum sem fjallað var um í dómi Hæstaréttar í máli Kraftvélaleigunnar gegn Glitni. Þannig séu stöðluð ákvæði samningsins í þessu máli skýr og eiga eingöngu við um fjármögnunarleigusamninga. Þá sé í samningi málsaðila fjallað um leigu og er áfrýjandi þar ítrekað nefndur leigusali.