Rekstrarhagnaður Eimskips rúmur milljarður

Heildarvelta samstæðu Eimskips á fyrsta ársfjórðungi ársins 2012 nam 15,3 milljörðum kr. (€ 93,7 m) samanborið við 14,3 milljarða kr. árið 2011.

Rekstrarhagnaður (EBITDA) var 1,1 milljarður kr. (€ 6,8 m), en var 2,1 milljarður kr. á sama tímabili árið 2011.

Frávikið í rekstrarhagnaði á milli ára skýrist af því að á fyrsta ársfjórðungi 2011 innheimti félagið útistandandi kröfu sem nam einum milljarði kr., en krafan hafði áður verið að fullu færð niður í bókum félagsins. Hagnaður eftir skatta var 98 milljónir kr. (€ 0,6 m) en var 928 milljónir kr. árið 2011.

Heildareignir félagsins í lok mars 2012 námu 48,1 milljarði kr. (€ 285 m) og var eiginfjárhlutfallið 62,1%.

Vaxtaberandi skuldir námu 10,5 milljörðum kr. (€ 62 m). Flutningsmagn í siglingakerfum félagsins á Norður Atlantshafi jókst um 9,7% á fyrsta ársfjórðungi á milli ára á meðan flutningsmagn í alþjóðlegri frystiflutningsmiðlun Eimskips jókst um 4,3% á sama tíma.