Everton í viðræðum við Lilleström um kaup á Birni Bergmann

Enska dagblaðið Liverpool Echo greinir frá því á heimasíðu sinni að Everton sé í viðræðum við Lilleström um kaup á íslenska landsliðsmanninum Birni Bergmann Sigurðarsyni.

Að sögn blaðsins voru útsendarar frá Everton á vellinum þegar Björn skoraði sigurmark Lilleström á lokamínútunni gegn Sogndal síðastliðinn sunnudag.

Anderlecht, Reading og Wolves hafa sýnt áhuga á Skagamanninum en Everton virðist skv. blaðinu hafa tekið frumkvæðið í kapphlaupinu. Kaupverðið á kappanum er talið vera í kringum þrjár milljónir punda eða sem nemur rúmum 600 milljónum íslenskra króna.