Stjórn CCP vill fá heimild til lántöku upp á 2,5 milljarða

Fyrir aðalfundi tölvuleikjaframleiðandans CCP liggur fyrir tillaga stjórnar félagsins um að það hafi heimild til „að taka skuldabréfalán allt að fjárhæð USD 20.000.000 til allt að fimm ára með breytirétti í hlutabréf á tilteknum kjörum og uppgreiðslurétti," eins og orðrétt segir í blaðaauglýsingu stjórnar CCP vegna aðalfundarins. Upphæðin jafngildir um 2,5 milljörðum króna.

Í auglýsingunni segir enn fremur að kjör breytiréttarins séu nánar skilgreind í skilmálum skuldabréfanna og liggja ítarupplýsingar um skilmálana frammi á skrifstofu félagsins, að því er segir í auglýsingunni.

Hilmar Veigar Pétursson, forstjóri CCP, sagðist í samtali við fréttastofu í morgun ekki getað úttalað sig um rekstrartölur eða framtíðaráform félagsins, fyrr en kynning á þeim þáttum hefði farið fram á aðalfundinum 12. júní nk. Hilmar sagði þó að það sem auglýst hefði verið, meðal annars möguleiki á fyrrnefndri lántöku, væri frekari undirbygging fyrirtækisins vegna útgáfu DUST 514, nýjum leik á vegum CCP, en Hilmar Veigar segir fyrirtækið hafa fengið góðar viðtökur við leiknum þegar hann hefur verið kynntur.

Frekari kynningar á leiknum eru framundan, m.a. á stórri leikjaráðstefnu í Los Angeles í næstu viku.

Í auglýsingu stjórnar CCP vegna aðalfundarins kemur einnig fram sú tillaga stjórnar að hún fái heimild til þess að hækka hlutafé um allt að 625 þúsund að nafnvirði með útgáfu nýrra hluta í tengslum við skuldabréfalánið.

Tæknisíðan Tech Crunch greindi frá því fyrr á þessu ári að heildartekjur CCP í fyrra hefðu numið um 66 milljónum dala, eða sem nemur um 8,3 milljörðum króna.

Sjá má frétt Vísis um umfjöllun Tech Crunch hér.