Vísar ábyrgð á lögmannsstofuna

Kári Arnór, framkvæmdastjóri lífeyrissjóðsins Stapa, vísar ábyrgð á því að rúmlega 5 milljarða króna kröfu lífeyrissjóðsins í þrotabú Straums-Burðaráss hafi verið lýst of seint alfarið á lögmannsstofunna sem vann fyrir lífeyrissjóðinn.

„Starfsmenn sjóðsins, sem unnu að þessu máli á sínum tíma, skiluðu af sér sínu verki með sóma og alveg eftir settum reglum. Öll gögn voru afhent lögmannstofunni sem vann fyrir sjóðinn góðum mánuði fyrir lok skilafrests. Þetta hefur óðháður endurskoðandi yfirfarið og staðfest. Mistökin voru gerð hjá lögmannstofunni. Ég vil þó taka fram að lögmannsstofan hafði starfað fyrir sjóðinn í um áratug og skilað góðu starfi, m.a. lýst fyrir sjóðinn hundruðum krafna án nokkurra mistaka. En að þessu sinni urðu mistök og þau hafa verð okkur dýr. Ég geri ráð fyrir því að stjórn sjóðsins fjalli um þetta mál einhvern næstu daga og þá kemur í ljós hvort einhver frekari viðbrögð verða," sagði Kári Arnór í yfirlýsingu á vef Stapa.

Kári Arnór segir niðurstöðuna vera mikil vonbrigði, en vitað hafi verið að það gæti brugðið til beggja vona í málinu.