Munu horfa til Haga þegar Eimskip fer á markað

Skráning Haga í Kauphöllina verður höfð til fyrirmyndar þegar Eimskip fer á markað í haust, segir Gylfi Sigfússon, forstjóri fyrirtækisins, í samtali við fréttastofu. Íslandsbanki og Straumur hafa verið fengnir til að sjá um ferlið.

Að hans sögn er enn óákveðið hversu stór hlutur verður seldur en Viðskiptablaðið greindi frá því í síðasta mánuði að um 30-35% hlutur yrði seldur. Gamli Landsbankinn og fjárfestingafélagið Yucaipa eiga 70% hlut í félaginu samanlagt og það eru þessir aðilar sem eru að selja.

„Þetta verður væntanlega með mjög svipuðu sniði og Hagar. Félagið skráð í október og þar á undan fer fram það sem heitir bookbuilding þar sem rætt er við lífeyrissjóði og menn skrifa sig fyrir hlutum og svo er félagið skráð," segir Gylfi.

Gylfi segist búast við því að það verði mikil þátttaka einstaklinga og fagfjárfesta í útboðinu, enda eigi Eimskip sér langa sögu.