Efasemdir um að Landsvirkjun nái hærra orkuverði

Lækkun raforkuverðs til stóriðju í Bandaríkjunum gæti skert möguleika Landsvirkjunar til orkusölu og þar með hægt á iðnaðaruppbyggingu á Íslandi. Þetta segir Ketill Sigurjónsson, sérfræðingur um orkumál.

Ketill rekur í grein á netsíðu sinni, Orkublogginu, hvernig aukið framboð á ódýru gasi í Bandaríkjunum hafi leitt til verðlækkunar á raforku til stóriðju þar í landi. Ketill telur að þessa sjái þegar merki hérlendis, í því til dæmis hve erfiðlega Landsvirkjun gangi að semja um orkusölu til kísilvera. Hann segir í viðtali í hádegisfréttum Bylgjunnar blasa við að fyrirtæki, sem er að semja um orkuverð við Landsvirkjun, geti einfaldlega bent á orkuverðið í Bandaríkjunum og reynt að pressa verðið niður.

Ketill segir spár misvísandi um það hvort þetta sé varanleg verðlækkun. Bandaríska orkumálaráðuneytið telji til dæmis að raforkuverð þar eigi eftir að haldast þokkalega lágt næstu árin og jafnvel áratugi, vegna mikils framboðs af ódýru gasi, og gangi það eftir verði erfiðara fyrir Landsvirkjun að fá fyrirtæki til Íslands gegn því að borga mun hærra raforkuverð en tíðkast hafi til þessa.

"Það er kannski lengra í það að arðsemi í raforkuvinnslu á Íslandi aukist mikið, eins og við höfum verið að vona," segir Ketill Sigurjónsson.