Verðmætið jókst um 7,8 prósent

Verðmæti útflutningsframleiðslu sjávarafurða nam rúmum 256 milljörðum króna á síðasta ári og jókst um 7,8% frá árinu 2010. Þetta er á meðal þess sem fram kemur í ritinu Útflutningur og útflutningsframleiðsla sjávarafurða 2011. Er þar um að ræða samtölu útflutnings og birgðabreytinga sjávarafurða. Á heimasíðu Hagstofunnar kemur einnig fram að framleiðslan mæld á föstu verði hafi aukist um 10,3%.

„Fluttar voru út sjávarafurðir að verðmæti 252 milljarðar króna og jókst verðmæti þeirra milli ára um 14,1% og í magni um 6,4%. Árið 2011 voru flutt út 672 þúsund tonn samanborið við 632 þúsund tonn árið áður," segir ennfremur. Þá segir að frystar afurðir hafi skilað 57% af heildarútflutningsverðmæti. „Af einstökum afurðum vóg verðmæti heilfrysts makríls mest, 24 milljarðar króna. Af heildarútflutningi sjávarafurða fór 72% til Evrópska efnahagssvæðisins, 8,8 % til Asíu og 4,9% til Afríku."