Ólafur og Dorrit í fyrstu ferðinni til Prag

Ólafur Ragnar Grímsson, forseti Íslands, og Dorrit Moussaieff forsetafrú, verða farþegar í fyrstu ferð Iceland Express til Prag, höfuðborgar Tékklands. Þann 16. maí næstkomandi hefur félagið flug til borgarinnar, sem er einn vinsælasti áfangastaður í Evrópu.

Í tilkynningu segir að farþegar í fyrstu ferðinni geti fylgst með hátíðlegri athöfn fyrir utan forsetahöllina í Prag þegar Vasláv Klaus forseti landsins tekur á móti Ólafi Ragnari og frú. „Strax þar á eftir verður farið í spennandi gönguferð um gömlu miðborgina. Þá munu Andrea Gylfadóttir og Eddi Lár halda tónleika á Lavka,  einum vinsælasta næturklúbbi Prag,  ásamt tékknesku sveitinni Jazz Farm til að fagna þessum nýja áfangastað, sem Iceland Express mun einnig fljúga til næsta vetur. "

„Samstarf félagsins við Holidays Czech Airlines og systurfélag þess Czech Airlines, opnar algerlega nýja og spennandi ferðamöguleika fyrir Íslendinga í austur Evrópu og gerir íbúum álfunnar kleift að ferðast til Íslands allt árið á hagstæðum kjörum, íslenskri ferðaþjónustu til hagsbóta. Bæði er hægt að kaupa pakkaferð með Úrval Útsýn í fyrsta flugið hinn 16. maí eða bóka flugið eitt og sér hjá Iceland Express,“ segir í tilkynningunni.