Saumavélin til sýnis

Saumavélin, ein fyrsta IBM fartölvan, sem kom á markað árið 1984, verður sýnd á afmælisráðstefnu Nýherja, sem fer fram á Hótel Nordica á morgun. Á ráðstefnunni verður hægt að sjá búnað frá árdögum fartölvuvæðingarinnar; fyrstu vélarnar með innbyggðu geisladrifi og fyrstu vélarnar með innbyggðu þráðlausu neti.

Í tilkynningu segir að Saumavélin, sem var með innbyggt lyklaborð, hafi verið mikil bylting fyrir fyrirtæki því í fyrsta skipti var hægt að ferðast með tölvu á milli funda.

„„Það var hins vegar ekki fyrr en á 10. áratug 20. aldar sem fartölvur hófu að þróast allverulega og notagildi þeirra jókst umtalsvert. Það hefur því margt breyst í þróun á þessum tækjum á mjög skömmum tíma. Sem dæmi má nefna að árið 1994 komu IBM með fartölvu sem bjó yfir innbyggðu geisladrifi. Hún gerði notendum kleift að hlaða inn og nota mikið af gögnum með einföldum hætti. Þetta þótti mikil bylting þá en sjálfsagt mál í dag," segir Gísli Þorsteinsson markaðsstjóri Nýherja, í tilkynningu.