Vörður tryggingar skilaði 330 milljóna hagnaði 2011

Rekstur Varðar trygginga hf. skilaði 330 milljóna hagnaði á síðasta ári. Þetta er um 59% aukning frá árinu 2010 þegar 208 milljóna króna hagnaður varð af rekstrinum.

Þá jukust heildartekjur fyrirtækisins um 9.8% á síðasta ári en þær voru 4.5 milljarðar króna. Árið 2010 voru heildartekjur Varðar trygginga hf. um 4.1 milljarðar króna.

Eiginfjárhlutfall fyrirtækisins er 24.4% í lok ársins 2011 en það var 22.6% í árslok 2010 og hækkar því um 1.8% milli ára.

Þá var arðsemi eiginfjár 17.5% samanborið við 15.8% árið 2010.

Guðmundur Jóhann Jónsson, forstjóri Varðar trygginga hf. segir að rekstrarniðurstöður fyrir árið 2011 sýni að fyrirtækið hafi fest sig í sessi sem traustan valkost fyrir einstaklinga, heimili, fyrirtæki og stofnanir.

Þá var ný stjórn kjörin á aðalfundi félagsins á mánudaginn. Í henni sitja Jens Erik Christensen, stjórnarformaður, Janus Petersen, Friðrik Jóhannsson og Jón Björnsson.