Saksóknari telur að dæma hefði átt Geir fyrir víðtækari brot

Róbert Spanó, forseti lagadeildar Háskóla Íslands, telur að afnema eigi ákæruvald Alþingis þegar kemur að brotum gegn lögum um ráðherraábyrgð, og færa slíkar rannsóknir í hefðbundinn farveg sakamála. Sigríður Friðjónsdóttir saksóknari telur að dæma hefði ár Geir fyrir víðtækari brot en hann var dæmdur fyrir.

Landsdómsmálið var til umræðu á fundi Orators, félags lögfræðinema við Háskóla Íslands og Lagastofnunar Háskóla Íslands, í dag en frummælendur voru Róbert Ragnar Spanó, forseti Lagadeildar Háskóla Íslands, Sigríður Friðjónsdóttir, sem var saksóknari Alþingis í málinu gegn Geir, og síðan Friðrik Árni Friðriksson, lögfræðingur en hann var aðstoðarmaður Andra Árnasonar, lögmanns Geirs, við málareksturinn fyrir landsdómi.

Sigríður undraði sig á því að Geir hefði ekki verið sakfelldur fyrir 141. grein almennra hegningarlaga, eins og varakrafa saksóknara í málinu var uppi um. Sú lagagrein, segir að opinber starfsmaður, sem sekur gerist um stórfellda eða ítrekaða vanrækslu eða hirðuleysi í starfi sínu, skal sæta sektum eða fangelsi allt að einu ári.

Friðrik sagði rannsókn málsins hafa verið ófullnægjandi, og ekki hefði verið farið eftir grundvallarreglum sakmálaréttarfars, þ.e. að ákvörðun um ákæru væri tekin að lokinni sjálfstæðri rannsókn sem beindist að tilteknum atriðum.

Allir frummælendur tóku undir það að gera þyrfti breytingar á lögum, í þá veru að ákæruvaldið í málum er vörðuðu meint brot á lögum um ráðherraábyrgð, yrði tekið frá Alþingi.

Smelltu á hlekkinn „Horfa á myndskeið með frétt" til þess að sjá fund Orators í heild sinni.