Fjögur fordæmi fyrir leiðinni sem Nubo fer

Hvorki Steingrímur J. Sigfússon, efnahags- og viðskiptaráðherra og sjávarútvegs- og landbúnaðarráðherra, né Ögmundur Jónasson innanríkisráðherra sögðust vita til þess að niðurstaða vegna kaupa Huangs Nubo lægi fyrir og að málið yrði kynnt í ríkisstjórn á föstudaginn. Vísir náði tali af þeim Ögmundi og Steingrími nú í kvöld.

Unnið hefur verið að því að finna leið sem gerði Huang Nubo fært að fjárfesta á Grímsstöðum á Fjöllum frá því að Nubo var synjað um leyfi til þess að kaupa landið. Lausnin felur í sér að félag í eigu Nubos stofnar íslenskt félag sem verður leigutaki að jörðinni. Sveitarfélögin á Norðurlandi og Austurlandi stofna svo sameiginlega félag sem mun leigja landið út.

Sú leið sem til stendur að fara til þess að kínverski fjárfestirinn Huang Nubo geti fjárfest í ferðaþjónustu á Grímsstöðum á Fjöllum byggir á lögum um ívilnanir vegna nýfjárfestinga á Íslandi. Lögin eru frá árinu 2010 og þeim var ætlað að stuðla að auknum fjárfestingum hérlendis eftir efnahagshrunið.

Samkvæmt heimildum Vísis eru minnst fjögur dæmi um fjárfestingar sem ráðist hefur verið í á grundvelli þessara laga. Það eru Becromal á Akureyri, kísilmálmverksmiðja Thorsil, sem áformuð er á Húsavík með kanadískum fjárfestum, kísilverksmiðja í Helguvík, sem bandarískir fjárfestar standa á bak við, og gagnaver Verne Holding á Keflavíkurflugvelli.

Fjárfestingasamningur vegna verkefnisins verður að öllum líkindum kynntur í ríkisstjórn á föstudaginn, en unnið hefur verið að samningnum að undanförnu. Slíkur samningur gefur opinberum aðilum færi á að veita Nubo frekari ívilnanir vegna fjárfestinga hans. Til dæmis með því að heimila honum að fresta greiðslu tekjuskatts og sveitarfélög fái heimild frá ríkissjóði til að lækka fasteignagjöld sem innheimt verða af Nubo.