Íslenskur hugbúnaður sigraði í Rio de Janeiro

Hugbúnaðarlausnin CityDirect sem þróuð er af ICEconsult ehf. sigraði í alþjóðlegri samkeppni LivingLabs-Global í Rio de Janeiro í Brasilíu í gær.

Hugbúnaðurinn sigraði í flokknum „Public Project Portal." CityDirect er ein af 21 hugbúnaðarlausnum sem hlutu viðurkenningu í ár en 555 lausnir frá 50 löndum tóku þátt.

CityDirect er lausn fyrir sveitarfélög til að gefa íbúum kost á að hafa áhrif á ákvarðanatöku um framkvæmd valdra verkefna með beinum hætti. Verkefnið 1, 2 og Reykjavík notaðist við eldri kynslóð hugbúnaðarins en CityDirect hefur nú tekið næsta skref og gefur íbúum tækifæri til að velja á milli verkefna.

„CityDirect byggir á MainManager hugbúnaðinum okkar," segir Ragnar Hólm Gunnarsson hjá ICEconsult ehf. „Hugbúnaðurinn er í raun viðmót fyrir borgara þegar kemur að ákvarðanatöku um borgarskipulag. Forritið gefur þannig færi á að auka og einfalda íbúalýðræði."

Það var borgin Kristiansand í Noregi sem valdi CityDirect en samkeppnin gengur út á það að borgir skrá sig til leiks með ákveðið vandamál sem vantar lausn á og fyrirtæki bjóða lausnir til að leysa þau. Nú tekur við samstarf með Kristiansand þar sem borgin mun taka CityDirect hugbúnaðarlausnina í notkun.

Ragnar bendir á að ICEconsult ehf. sé nú þegar með starfsemi í Noregi. Ríkisfyrirtækið Statsbygg hefur notað MainManager hugbúnaðinn síðustu mánuði en forritið hugsað sem heildarlausn í stjórnun fasteigna.