Borgin kaupir bíla fyrir 300 milljónir

Reykjavíkurborg hyggst kaupa nýja bíla fyrir rúmlega 300 milljónir í ár. Dagur B. Eggertsson, formaður borgarráðs, segir að tilgangurinn með því að kaupa nýja bíla sé að fá sparneytnari og umhverfisvænni bíla í flotann og samnýta bílana betur. Erindi frá framkvæmda- og eignasviði borgarinnar var afgreitt í borgarráði á fimmtudaginn.

„Þetta eru bílar af öllum sviðum borgarinnar. Við erum að fara í aukna samnýtingu þannig að við erum að fækka bílum um 30% og erum að kaupa sparneytnari og umhverfisvænni bíla ef útboðin ganga eftir eins og við viljum," segir Dagur. Innkaupaskrifstofa mun undirbúa útboð og Dagur vonast til þess að ferlið fari í gang sem fyrst. Samningar vegna bílakaupanna verða boðnir út í fleiri en einu útboði.

Flestir bílar í bílaflota Reykjavíkurborgar voru reknir með rekstrarleigusamningi allt fram að hruni. Dagur segir að þá hafi slíkum rekstrarleigusamningum verið sagt upp og eftir það hafi þurft að hugsa bílamálin upp á nýtt. Þá hafi verið unnið að því að fækka bílum, auka samnýtingu og fá bíla sem væru hagstæðari í rekstri.