Umboðsmaður skuldara og fjármálafyrirtækin sammála

Ekki er hægt að hefja endurútreikning íbúðalána sem falla undir dóm Hæstaréttar frá því í febrúar, vegna óvissu um reikningsaðferð. Þetta kemur fram í sameiginlegri fréttatilkynningu frá Samtökum fjármálafyrirtækja og Umboðsmanni skuldara. Dómurinn féll í máli hjóna gegn skilanefnd Frjálsa fjárfestingabankans. Samkvæmt dómnum máttu bankarnir ekki reikna seðlabankavexti af gengistryggðum lánum afturvirkt heldur áttu samningsvextir að gilda.

Þann 9. mars siðastliðinn heimilaði Samkeppniseftirlitið fjármálafyrirtækjum samstarf sem miðar að því að hraða úrvinnslu skuldamála sem varða gengistryggð lán í framhaldi af dómnum. Auk fjármálafyrirtækja áttu umboðsmaður skuldara, Neytendastofa og talsmaður neytenda aðild að samstarfinu.

Í tilkynningu sem send var út í dag vegna samstarfsins kemur fram að áður en endurútreikningur á íbúðalánum sem alltaf hafa verið í skilum og falla undir dóminn getur hafist sé mikilvægt að fá úr því skorið hvaða reikningsaðferð skal nota og frá hvaða tímamarki lántaki var ekki lengur í góðri trú með að greiða samningsvexti.