Formaður LL: Stjórnarlaun Framtakssjóðsins of há

Arnar Sigurmundsson, formaður Landsamtaka lífeyrissjóða, segir að laun stjórnarmanna Framtakssjóðs Íslands hafi verið hækkuð alltof of mikið á aðalfundi sjóðsins sem fram fór 17. apríl sl. Laun almennra stjórnarmanna voru hækkuð um 80 prósent, úr 100 þúsund krónum í 180 þúsund.

Eigendur Framtakssjóðs Íslands eru sextán lífeyrissjóðir, þar á meðal allir stærstu lífeyrissjóðir landsins, auk tveggja fyrirtækja, en það eru Vátryggingafélag Íslands, sem á 0,55 prósent hlut, og Landsbanki Íslands, en hann á ríflega 27 prósenta hlut.

Ákveðið var á aðalfundi Framtakssjóðsins 17. apríl að hækka laun stjórnarmanna Framtakssjóðsins um 80 prósent, úr 100 þúsund í 180 þúsund. Formaður stjórnarinnar, Þorkell Sigurlaugsson, fær tvöföld stjórnarlaun, eða 360 þúsund og varaformaður stjórnarinnar, Jón Steindór Valdimarsson, fær 1,5 stjórnarlaun, eða 270 þúsund.

Arnar Sigurmundsson, formaður Landsamtaka lífeyrissjóða, segir þessa launahækkun hafa verið of mikla, en hann lagði til á fundinum að launin yrðu 125 þúsund krónur. Þeirri tillögu var hafnað, m.a. með stuðningi Landsbankans.

Framtakssjóðurinn hagnaðist um 2,3 milljarða í fyrra, heildareignir voru metnar á ríflega 28 milljarða og eigið fé sjóðsins er 27,5 milljarðar, en meðal stórra eigna sjóðsins eru eignarhlutir í Icelandair, N1, Vodafone og Promens.