Ferðamönnum frá Kína fjölgaði um 80%

Ferðamönnum frá Kína fjölgaði um 80% í fyrra og útflutningur frá Íslandi til Kína jókst um tæp 60%. Össur Skarphéðinsson utanríkisráðherra átti fund með Chen Deming, viðskiptaráðherra Kína, í morgun en hann fer með utanríkisviðskipti og er í föruneyti Wen Jiabao, forsætisráðherra Kína, sem er í opinberri heimsókn hér í dag og á morgun.

Ráðherrarnir ræddu yfirstandandi fríverslunarsamningaviðræður Íslands og Kína þar sem utanríkisráðherra óskaði eftir því að ný lota í fríverslunarviðræðunum yrði haldin hið fyrsta og að tollalækkanir á fiskafurðum tækju gildi strax við gildistöku samningsins eða fyrr, eftir því sem fram kemur í tilkynningu frá ráðuneytinu.

Ráðherrarnir fögnuðu auknum viðskiptum milli landanna og utanríkisráðherra hvatti Kínverja til að taka vel á móti íslenskum fyrirtækjum sem sæktu á Kínamarkað. Útflutningur frá Íslandi til Kína jókst um tæp 60% á milli áranna 2010 og 2011 og innflutningur frá Kína um rúm 20%. Þá sóttu um 9000 kínverskir ferðamenn Ísland heim árið 2011 en það er um 80% aukning á milli ára.

Á fundinum óskaði utanríkisráðherra eftir útvíkkun á loftferðasamningi ríkjanna sem kínverski ráðherrann sagðist myndu koma á framfæri og hvatti til þess að málið yrði rætt í sameiginlegri viðskiptanefnd landanna ásamt öðrum mikilvægum viðskiptamálum milli ríkjanna. Utanríkisráðherra tók upp málefni norðurslóða og tækifærin sem breyttar siglingaleiðir myndu skapa til framtíðar. Kínverski ráðherrann fagnaði auknum viðræðum milli landanna um þau mál.