Útgerðarfélagið Samherji virðist í mótsögn við sjálft sig

Svo virðist sem útgerðarfélagið Samherji sé komið í mótsögn við sjálft sig með því að láta fiskverkafólk á Dalvík sitja heima í stað þess að vinna.

Í fréttum í Ríkisútvarpinu í gær kom fram að hið þýska dótturfélag Samherja, Deutsche Fischfang Union, hefði ákveðið að viðhalda löndunarbanni sínu gagnvart Dalvík. Af þeim sökum voru um eitthundrað fiskverkakonur og menn heimavið í bænum allan daginn í stað þess að stunda vinnu sína.

Ástæðan sem forstjóri hins þýska félags gaf fyrir þessu var að Seðlabankinn hefði ekki upplýst Deutsche Fischfang Union um í hverju hugsanleg brot Samherja á gjaldeyrislögunum væru fólgin. Það vill svo til að Seðlabankinn er bundin af lögum að gefa þetta upp og gerði það í svari til Samherja, móðurfélags Deutsche Fischfang Union. Um leið og Samherji fékk þær upplýsiningar í hendur fyrir skömmu sendi útgerðin frá sér tilkynningu um að ekkert væri hæft í rannsókn Seðlabankans og að félagið væri með hreinan skjöld.

Sökum þessa misræmis sendi fréttastofa Seðlabankanum fyrirspurn um hvort hið þýska dótturfélag væri hér að saka bankann um lögbrot. Bankinn svaraði því til að meðan málið væri í rannsókn fengjust ekki frekari upplýsingar þar á bæ.