Minkabændur seldu fyrir um 400 milljónir í Kaupmannahöfn

Metverð fékkst fyrir íslensk minkaskinn á uppboði hjá Kopenhagen Fur í Kaupmannahöfn í upphafi vikunnar.

Samtals seldust íslensk skinn fyrir um 400 milljónir króna en meðalverð á skinn var í kringum 11 þúsund krónur og hefur aldrei verið hærra í sögunni. Um 40.000 skinn voru seld.

Verðið hækkaði um 10% frá uppboðinu í febrúar s.l. þegar seld voru íslensk skinn fyrir hátt í 300 milljónir króna.

Búist er við að verð á minkaskinnum haldi áfram að hækka út þetta ár en það eru einkum Kínverjar sem standa að baki stóraukinni eftirspurn eftir minkaskinnum á þessum uppboðum í Kaupmannahöfn.