Getum stytt okkur leið út úr gjaldeyrishöftunum

Ísland gæti komið krónunni í skjól fram að upptöku evrunnar, einungis fáeinum mánuðum, eftir að við fengjum formlega aðild að Evrópusambandinu. Þetta segir Össur Skarphéðinsson utanríkisráðherra í nýrri skýrslu um utanríkismál og aðildarviðræður við Evrópusambandið sem dreift hefur verið á Alþingi.

Össur segir að þetta yrði gert með þátttöku í svokölluðu ERM II gjaldmiðlasamstarfi með stuðningi Seðlabanka Evrópu, sem yrði undanfari þess að Ísland gerðist aðili að evrusamstarfi. Um þetta þurfi hins vegar að semja og þessvegna sé nú nauðsynlegra en nokkru sinni fyrr að halda viðræðunum við Evrópusambandið áfram af fullum þrótti.