Verulega dregur úr fjölda langtímaatvinnulausra

Verulega hefur dregið úr fjölda þeirra sem verið hafa án atvinnu í ár eða meira og teljast langtímaatvinnulausir . Á fyrsta ársfjórðungi ársins voru þeir 1,6% af öllu vinnuaflinu en á sama tímabili í fyrra var hlutfallið 2,2%.

Fjallað er um málið á vefsíðu Hagstofunnar. Þar segir að einnig hafi þeim fækkað sem verið hafa atvinnulausir í skamman tíma. Af þeim sem voru atvinnulausir á fyrsta ársfjórðungi ársins voru að jafnaði 2.200 manns búnir að vera atvinnulausir í 1–2 mánuði eða 1,2% vinnuaflsins. Til samanburðar höfðu 2.400 manns verið atvinnulausir í 1–2 mánuði á fyrsta ársfjórðungi 2011 eða 1,4% atvinnulausra.

Á fyrsta ársfjórðungi ársins höfðu um 2.800 manns verið atvinnulausir lengur en eitt ár eða 1,6% alls vinnuaflsins. Á fyrsta ársfjórðungi í fyrra voru þeir sem höfðu verið atvinnulausir ár eða lengur um 3.800 manns eða 2,2% vinnuaflsins.