UPS kaupir metansendibíla frá Mercedes Benz

Hraðsendingarfyrirtækið UPS hefur fengið afhenta þrjá Mercedes-Benz Sprinter sendibíla sem eru allir metanknúnir. Bílarnir eru notaðir til útkeyrslu á hraðsendingum og almennum flugsendingum frá Keflavíkurflugvelli til höfuðborgarsvæðisins og Suðurnesja.

Sigþór Kristinn Skúlason, framkvæmdastjóri Express ehf, sem er umboðsaðili fyrir UPS á Íslandi segir að auk þess að vera umhverfisvænir verði umtalsverður sparnaður af rekstri þeirra.

„Við erum að horfa á hreinan eldsneytissparnaði auk þess sem við spörum dýrmætar gjaldeyristekjur með því að nota einvörðungu íslenskt eldsneyti, „ segir Sigþór Kristinn Skúlason í tilkynningu um málið.

Sprinter bílarnir þrír eru sérpantaðir fyrir UPS og eru í sérstökum brúnum lit fyrirtækisins. Bílarnir eru sérútbúnir til dreifingarþjónustu og auðvelda þannig alla vinnu ökumanns og umgengi hans um bílinn.