Virkjanalónin að fyllast og vorleysingarnar eftir

Vatnsbúskapur Landsvirkjunar er með besta móti þessa dagana og eru flest virkjanalón á góðri leið með að fyllast, þrátt fyrir að vorleysingar séu ekki enn hafnar á hálendinu.

Þetta á við um öll miðlunarlónin, að sögn Guðmundar Björnssonar hjá Landsvirkjun, og nefnir hann sem dæmi að Hálslón standi nú 20 metrum hærra en á sama tíma í fyrra. Þá sé Þórsvatn átta og hálfum metra hærra en um þetta leyti í fyrra og komið í sömu stöðu og það var um mánaðamótin júní - júlí á síðasta ári. Aðeins vanti 170 sentímetra upp á að Þórisvatn fyllist.

Í Fljótsdal sjá menn fram á góðan rekstur. Georg Pálsson, stöðvarstjóri Kárahnjúkavirkjunar, segir horfurnar mjög góðar fyrir þetta ár og vatnshæð í Hálslóni sé núna langt yfir meðalári.

Hálslón er nú álíka hátt og það var um mánaðamótin júlí - ágúst í fyrra og það þrátt fyrir að vorleysingar teljist ekki enn hafnar á hálendinu. Georg segir að töluvert hafi snjóað í október og síðan hafi komið riginingar og hlýindi í nóvember og Hálslón þá fyllst aftur. Veðráttan hafi síðan reynst hagstæð.

Gott vatnsrennsli er helsta forsenda tekna Landsvirkjunar sem í fyrra námu um 56 milljörðum króna. Stærsti hlutinn kemur frá Kárahnjúkavirkjun en miðað við meðalverð til stóriðju, sem gefið er upp í ársskýrslu, má ætla að stöðvarhús hennar í Fljótsdal hafi eitt og sér skilað sautján milljarða króna raforkusölutekjum á síðasta ári. Það jafngildir um einum og hálfum milljarði króna á mánuði og um fimmtíu milljónum á degi hverjum, verðmætin sem verða til í hverflum Kárahnjúkavirkjunar.