Kirkjugarður á Seltjarnarnesi?

Kirkjugarður gæti risið á Seltjarnarnesi ef hugmyndir þess efnis ná fram að ganga. Þrjár staðsetningar koma til greina fyrir allt að þrjú þúsund grafir.

Unnið hefur verið að hugmynd um kirkjugarð á Seltjarnarnesi síðan um áramótin eftir að áskorun þess efnis kom frá velunnara kirkjunnar og hefur starfshópur um verkefnið skilað hugmyndum til skipulags og mannvirkjanefndar Seltjarnarnessbæjar.

„Þetta er nú svona miðað við þann fjölda sem býr hér á nesinu og líklega þörf næstu 30 ár eða svo. Þá eru það kannski um 3000 grafir í hefðbundnum krikjugarði og það er varla pláss fyrir slíkan garð nema á vestursvæðinu. Ein af tillögum starfshópsins um staðsetningu kirkjugarðsins er við Nesstofu en hér var kirkja og kirkjugarður á 18. öld," segir Guðmundur Einarsson, formaður sóknarnefndar á Seltjarnarnesi.

Svæðið sem um ræðir er um einn og hálfur hektari og áætlaður fyrir bæði duftker og hefðbundnar grafir. Önnur staðsetning sem kemur til greinar er norðar á vestursvæðinu þar sem skólagarðar voru staðsettir. Þá hefur einnig komið upp sú hugmynd að vera einungis með duftkirkjugarð við kirkjuna sjálfa en Guðmundur segir skiptar skoðanir um það.

„Sumum finnst það mismunun, sem það auðvitað er, ef menn geta ekki hvílt á nesinu öðruvísi en brenndir."

Hann segir að vel hafi verið tekið í hugmyndirnar en ekki verður gengið lengra með verkefnið fyrren sátt hefur náðst um staðsetningu og umgjörð. Þá segir hann það vera praktískt fyrir ástvini að geta vitjað leiða ættingja á heimaslóðum.