Fá ekki styrki fyrir lífrænan búskap vegna fjárskorts

Fjárskortur hefur orðið til þess að bændur sem vilja skipta yfir í lífrænan búskap hafa enn ekki fengið ríkissstyrk til að skipta um búskaparhætti. Í stefnuyfirlýsingu ríkisstjórnarinnar segir bændum skuli tryggður aðlögunarstuðningur skipti þeir úr hefðbundinni ræktun yfir í lífræna.

Þingsályktunartillaga nefndar um eflingu græna hagkerfisins var samþykkt með öllum greiddum atkvæðum á Alþingi á dögunum.

Meðal tillagna nefndarinnar er að lífrænt vottaðar vörur verði orðnar 15% af landbúnaðarframleiðslu á Íslandi árið 2010, og lífræn framleiðsla þannig margfölduð á þessum tíma.

Þá leggur nefndin til að stuðningur við aðlögun bænda að lífrænni framleiðslu verði aukinn til að tryggja framkvæmd á nýjum verklagsreglum um aðlögunarstuðning.

„Það hefur verið vinna í landbúnaðarráðuneytinu um aðlögunarstuðninginn , það hefur strandað á fjármagni eins og með margt annað í okkar ríkisbúskað eftir hrun, en við leggjum mikla áherslu á að þetta verði sett í aukinn forgang þannig að það verði aukið fjármagn sett í stuðning við bændur sem vilja taka upp þessa lífrænu búskaparhætti, segir Skúli Helgason, formaður þingnefndar um eflingu græna hagkerfisins.

Skúli tók í gær á móti skýrslu Samtaka lífrænna neytenda þar sem þau leggja til hvernig yfirvöld geta mótað stefnu til eflingar lífrænnar framleiðslu.

„Sjálfur er ég síðan að fara af stað í samráði við ríkisstjórnina með að móta þá aðgerðaáætlun sem þarf að verða til þegar þingið er búið að samþykkja þingsályktunina um eflingu græna hagkerfisins. Vinnan snýst ekki síður um að raða í forgang þessum fimmtíu tillögum sem komu út úr þeirri vinnu og tryggja fjármagn til að efling græna hagkerfisins getið farið strax af stað," segir Skúli.